回家

時間飛樣快﹐原來經已四月尾。將會返港兩星期。其實真正停港時間只有五日﹐其餘日子會到內地一遊。今次行程緊密﹐我略略將時間如下編排:
4/28 午間費城國際機場起飛
4/29 晚上邸港﹐與二姐會合﹐佢將往上海機票同回鄉證交俾我﹐我則將多餘行李交比佢。然後喺機場接住落嚟嘅6-7個鐘將二姐買俾我嘅上海旅遊通讀熟。
4/30 早機飛上海 5/3晚機回程
至於喺上海嘅行程就尚未有詳盡計劃。不過必見嘅人有陳同學﹐理子同學同馬教授。必到嘅地方有興建中嘅上海寰球金融中心同馬教授嘅建築事務所。其實我真有少許擔心咁嘅時勢﹐唔知理子同學喺中國安唔安全。至於馬教授﹐正直喺我於UPenn畢業同時決定回國專心打理自己公司。曾經游說我返去幫忙﹐但我當時留戀花旗﹐未有歸意。依家經過短短五年﹐佢嘅事務所已經打響名堂。曾入選美國Architectural Record世界十位"設計先锋"建築事務所之一。並入選英國Phaidon出版社编辑嘅世界500幢最有影響力優秀建築專集。而且入選意大利威尼斯雙年展（Venice Biennale），成为中國僅有嘅两家参展單位中嘅一家。以39歲年紀有咁嘅成就算係不可多得。所以今次一於厚住面皮拉一下關係﹐以後回歸好辦事。不過難得連報張雜誌記者都紛紛表示要揾佢難過登天嘅馬教授話我去到﹐佢奉陪。咁我點都要傷我荷包﹐補請佢食生日大餐啦。而陳同學話上海無嘢好玩﹐提意我去埋杭州。真係好想去﹐但無奈時間唔夠。不過或者可以斟酌一下。
5/4 終於辦正經事。早上九時申請美國簽證。因為家中五人有一人持美國護照﹐二人係美國永久居民身份﹐領事每每以"咁你都預備留低唔走架啦。咁你屋企人都可以申請你啦"嚟留難我。所以每次均似嚴刑逼供﹐一額汗。
辦完簽證﹐就會去探伯母同已歸塵土嘅世伯。曾話過要待佢哋如同自己父母﹐卻未盡孝心。諗唔到再見已隔天壤。世伯音容猶新﹐總忍唔住會幻想我去到時﹐佢如常笑吟吟由屋內迎出﹐再同我講一句"喺我心中﹐你就係我嘅女。"
5/5-5/6 會同家父去新會。父女倆齊齊喺姨媽辦工嘅醫院檢查身體。因為有姨媽一早做好準備﹐所以兩日就可以將各樣檢查做齊。實行年年驗身﹐令我放心。
5/7 乃真光校慶。終於可以一睹新校風貌。順便則問點解個噴水池旁會無草。晚上就係校慶聚餐。可以見齊各路舊生老師。
5/8 早上返教會。應該會去北宣第二堂。下午約左好姊妹嘅家人收大禮。希望之後可以再見見伯母。
5/9 上午如無意外就要續回鄉証。下午想踏足一下久聞其名嘅中大校舍。晚上希望約小姊妹一見。
5/10 將會喺瘋狂購物日。勢必將所有訂單一次殺盡。
5/11 晨早回美。
臨走P.S. : 各弟兄姊妹﹐只要有貨﹐你哋嘅訂單會辦妥架啦。
BL, 你自己保重啦。記得有需要就揾線人S。我已經用一杯奶昔收買左佢﹐佢會為你赴湯渡火。
BP﹐ 俾你最後一個機會﹐真係唔洗?
各位﹐兩星期後見。