多倫多豪華團之五星級大酒店

四日三夜嘅多倫多豪華團已經完滿結朿。今次有幸入住多倫多遠近馳名嘅盧氏夫婦大酒店。酒店內設備一流。酒店大堂設計高尚﹐傢俱新潮。有漢堡包椅﹐白鯨魚凳﹐出前一丁靠墊。而我所入住嘅201號房設有私人浴室﹐電視﹐錄影機﹐DVD機。私人浴室內設有整套手巾﹐毛巾﹐浴巾﹐專為住客而設嘅"花"皂液。而且處理嚴緊﹐衛生紙係摺成三角形嘅。就差在坐廁無用封條封起﹐寫住"已消毒"。酒店內娛樂豐富﹐有桌球室﹐24小時自助租鍱櫃檯﹐上網服務。酒店服務更加一流﹐有專車接送往返機場。酒店由上至下所有老闆﹐經理﹐員工﹐司機﹐打雜 (其實總共都係得兩個人) 態度誠懇﹐親切有禮。令人有賓至如歸嘅感覺。
下一次﹐我將會繼續為大家報導由盧氏夫婦大酒店贊助﹐有帝王式享受嘅多倫多四日三夜豪華團。