罪過﹐罪過

新同事嚟左唔夠一個月就辭工唔做。而且話辭就辭﹐一句交帶佢手上工作進度都無就走人。後來喺週會大老細先同我哋講﹐新同事話唔覺得自己有被同事歡迎嘅感覺﹐所以走人。大老細話雖然佢唔辭工都遲早會被炒﹐事關佢做唔夠一個月﹐但係個個禮拜都請一日病假﹐中午返屋企瞓晏覺﹐遲到早退﹐叫佢做嘅嘢無做就放工﹐又唔話俾上司聽無做到。雖然如此﹐但係都希望各同事能夠以此作借鏡﹐對以後新嚟嘅同事有多啲關懷﹐令佢哋有在家嘅感覺云云。
唔覺得有被同事歡迎嘅感覺? 牛龜咁大個男人﹐唔通重要大家圍著佢唱 "我們歡迎你﹐我們歡迎你。。。" 日日暄寒問曖不成?
不過回心諗﹐事實上各同事因對佢不滿﹐因此著實無話對佢特別友善。依家諗起自己都有少少內疚。佢被安排坐喺我哋嘅 pod (一個 pod 六個人)。本來坐我鄰座既同事A調過一格﹐新同事坐喺我同同事A中間。本來我哋兩個應該盡地主之儀。但係雖無話對佢有不滿﹐無奈同佢真係無甚話題﹐我平日都只係隨便同佢講兩三句。大概至命傷係我本來同同事A太熟﹐就算新同事未嚟﹐同事A就坐喺六尺之外。我哋都會無無聊聊咁打電話俾對方。大概我哋唔夠細心﹐而新同事又太敏感﹐見我哋兩個隔住佢用電話交談﹐雖然佢其實可以聽得一清二楚我哋嘅對話﹐不外乎係晏晝食嘜好﹐好眼瞓諸如此類嘅無聊對話﹐但係相信看喺新同事眼中就成為對佢嘅排斥。又一次﹐我無去一個公司聚會。第二日﹐同一個 pod 嘅同事D﹐同事M 將聚會影嘅一張 Charlie's Angel 做型照放喺我枱面﹐笑言叫我將自己 key 翻上去。我一睇張相﹐全個 pod 就只有我同新同事唔喺當中﹐但係佢哋只叫我放翻自己上去。。。。
我相信大家都唔係故意﹐只係唔夠敏感。由此又令我諗起喺教會當中﹐我哋又有無足夠嘅敏感度﹐讓新朋友或較內向嘅弟兄姊妹有在家嘅感覺? 承言我唔係一個好識得關懷別人嘅人﹐但依家我真係要好好學習。首先求神俾我有足夠嘅敏感度﹐能去感受別人嘅感覺。亦求神俾我有足夠嘅愛心﹐去愛人如己。愛嘅功課﹐真係一個要終生去學習嘅課題。