怪夢集

識我耐一啲或深入一啲嘅朋友都知﹐我係一個鍾意胡思亂想嘅人。連我自己都覺得﹐有時我啲思想真係太奔騰﹐好似唔係太聽主人話﹐拉都拉唔住。尤其係主人瞓緊嘅時候﹐更加會發揚光大。所以佢嘅主人我成日會發啲光怪陸離嘅夢。而且多數時候醒左重會記得好多細節。
有人話夢係黑白嘅﹐我絕對反對。因為我可以憑顏色判斷夢裡面嘅蟹是生是熟。又有人話夢裡係無嗅覺嘅﹐我又投反對票。皆因我曾經喺夢裡聞到煤氣味而知道隔離屋漏煤氣(當然只不過係發夢哪﹐係真嘅話就慘喇)。同時我亦證實夢裡係有味覺同觸覺嘅。
記得以前係香港返工時﹐我最鍾意講我發過嘅夢。而我嘅同事們亦會擔晒凳仔聽我講我啲騎呢夢﹐視為一大娛樂。曾經有諗過寫翻本怪夢集﹐將發過嘅夢收錄在案。將來再挪翻黎睇﹐一定會別有一番滋味在心頭。