<<華人差傳大會>>之(一)

本來無意於參加今年嘅<<華人差傳大會>>﹐因為同類形大會實在參予不少。而且實在休假超支﹐無法再請四日假嚟參加五日四夜嘅項目。後來因為大合唱人聲短缺﹐所以應承加入。因為據聞只要唱27﹐29號晚﹐無須請假。結果因為練習時間唔夠﹐所以27﹐29號下午亦要排練。本想只請兩個下午﹐但因為無人喺山喀拉時間車我入valley forge (當時亦唔知有巴士直達), 又突然發現今年休假無故增生﹐由本來以為嘅兩日變成八日半。靚太書記一計再計﹐都係八日半。一頭霧水之際又得知場務超缺。所以一不做二不休﹐決定主要嘅三日﹐都留守幫忙。然而當帶備三日行李到達會場之際先發現帶漏詩班制服。結果由最初嘅只唱詩班﹐變成無得唱詩班﹐全職場務。不過我卻係好高興如此結局﹐因為要兼負早晚兩堂召待同早午兩個講座嘅場務﹐無形中等於全程參予﹐免費聽左五堂加六個講座。
說實話﹐大會前嘅一些日子﹐我正處於屬靈低潮。雖然表面一切正常﹐但內裡對神話語嘅熱誠渴慕感動﹐一概欠奉。正喺游離中掙扎嘅當兒﹐大會嘅信息﹐好似一枝強心針﹐再次將熱誠渴慕同感動一點一滴慢慢輸入。
雖然每早七時就要報到﹐每日長時間站立﹐好幾餐都匆忙打發﹐但係相比各coordinators嘅辛勞﹐真係算不得甚麼。 更何況跌跌撞撞中再能窺見失落嘅信心。雖然依舊誠惶誠恐﹐但至少已從半沉睡嘅角落探首。至於幾日中嘅心聲﹐將會喺明後天再同大家分享。