聖誕系列之<<長島之旅>>

預告篇後一晃十日﹐終於有時間報導下長島特輯。每次入長島都會同周公子見面多過同家人見面。無疑我對周公子嘅愛慕之情真係好似天咁高﹐海咁深。而家人亦有心俾多啲時間我哋會面。所以每日我哋談完心後﹐都已日上三竿。小女子不才﹐為情所困。午飯後﹐又開始思念周某﹐總忍唔住﹐又要小會片刻。被愛情滋潤嘅我﹐特別容光煥發﹐精神飽滿。


不過除左周公子深得我心外。小人兒亦非常討人喜愛。左圖所見係大姐同父親嘅傑作。大姐對自製傢俱情有獨鍾。頂住大肚子都要開工製作小人兒嘅床。不過據大姐夫冒死向我報告﹐同前幾件傢俱一樣﹐小人兒床最終都係由父親執手尾。然而我都非常佩服大姐嘅多才多藝。
而右圖所見就係大姐同大姐夫嘅傑作。可愛嘅太陽眼鏡﹐當然係由有翻咁上下可愛嘅小姨送架啦。小小人兒鍾意呱呱叫﹐而每次都要由佢父母翻譯﹐我至明白其意思。
事實上喺長島嘅幾日真係無所事事。但卻係平淡嘅溫馨。今年同家人相聚嘅時間比往年多﹐實在珍貴每次嘅相處。亦要感謝父母家姐姐夫們嘅寵愛同鼓勵。我覺得好幸福。