聖誕系列之<<聯合崇拜>>

今個主日﹐如往年一樣﹐教會喺 Jefferson 嘅 Alumni Hall 舉行聯合崇拜。而今年嘅音樂奉獻除左聯合詩班之外﹐重加上英文堂嘅 A Capella choir, 同 bell choir。水準奇高。A Capella 猶如專業光鍱放送。據聞 bell choir 只練習過四次﹐但鈴聲之優美﹐幾次令我眼泛淚光。而李太為縫製紅色軟墊同桌布﹐連續多夜趕工﹐密密縫。自己喺聯合詩班﹐當然知道雖然練習時間唔多﹐但大家亦下過一番工夫。劉牧師嘅講道亦能讓我哋再一次思索聖誕嘅真義﹔降卑馬槽嘅王﹐血腥嘅大逃殺﹐逃難嘅日子﹔同我哋今日到處見到嘅酒醉派對﹐狂歡舞會﹐折然不同。而最後佢再重申我哋尊貴而滿有能力權能嘅王﹐竟然讓自己謙卑到降生馬槽﹐溫柔到可以被出賣﹐軟弱到可以被釘死。就係因為佢甘心嘅謙卑﹐溫柔﹐軟弱﹐至可以成就救恩。我哋今日至能夠歡慶聖誕。