制水

尋晚返到屋企收到通告一份。因為本座單位E同F今早需要修理水管﹐所以會暫停食水供應至午間一點。本來個時段對我一啲影響都無。但乍見通報﹐電光火石之間﹐立即諗到要唔要儲水。當然一秒之後就發現根本無咁嘅需要。不過由此可見我腦裡面嘅"全天候一見暫停供水立即自動開啟儲水警報系統"依然非常活躍。皆因兒時喺香港經常需要制水。雖未曾經歷過六十年代同七十年代初嘅大制水﹐但七十年代尾八十年代初嘅小制水則劫數難逃。每次制水前都會出動全屋嘅桶狀煲形物體嚟盛水。而且每次制水後一開水喉嘅頭十幾分鐘﹐簡直以為黃河水偷渡落香港。真係不勝其烏煙瘴氣之至。唔單只制水﹐停電亦係家常便飯。不過記憶所及﹐已經好耐好耐無呢家子戲上演哪。