做錯嘢

今日發現因為我嘅大意﹐某工程出現尺寸上嘅錯誤。講緊嘅係幾寸嘅差別。當然有啲情況﹐幾寸足以致命。但係好彩今次只不過係中小型嘅誤差。連頂頭上司(我嘅 mentor, 唔係緊張大師。我有兩個頂頭上司)都話問題唔大。但係我一直耿耿於懷。完全明白BL前一陣子嘅心情。
忽然又諗起上星期六﹐一班姊妹們喺探訪路上嘅對話。小姊妹初出茅蘆﹐因為覺得自己經常喺工作上出錯而感到不安。於是我用自己初入行嘅經歷嚟安慰佢﹐想佢知道普天之下﹐絕對唔只佢一個會出錯。話時話﹐依家諗起﹐都覺當年自己真係極盡白黐之能事。話說個年岩岩學堂畢業(有啲朋友可能唔知﹐我讀建築前係讀室內設計嘅﹐並且工作過一段短時間)﹐正值十八年華﹐嘜都蒙查查。第一日上司俾左個超簡單嘅任務我﹐就係刪除設計圖上嘅一條線。佢喺設計圖上鋪住嘅牛油紙度用箭嘴指住要刪除嘅線﹐並寫住"delete this line." 旨示非常明確。於是我喺設計圖上﹐線嘅旁邊用好工整嘅美術字寫住"delete this line﹐" 然後再加上我認為整齊到爆膨嘅箭嘴。上司見到時真係哭笑不得。我諗佢無當場吐血暴斃算佢道行高深。