講開又講

講開credit card scams, phone scams, 依架啲 scams 真係無奇不有。我自己則有三次類似嘅經歷。。。
第一次係我重喺Oregon 嘅時候。有一日﹐Capital One 致電聲稱我欠付卡數。但係我從來都無申請過Capital One 嘅信用卡. 原來係一個同我同姓嘅人兄用左我嘅電話地址申請信用卡。 而美國人唔知我嘅姓氏實乃尋常百家姓﹐認為我一定同該欠卡數人士有關﹐尤其係佢兩年前申報嘅電話地址係我已經用左五年嘅。所以甚至到後來 Capital One 請律師向我收數﹐依然無法辨明我與該人無關。最後我黎左費城﹐事件不了了之。
第二次係喺費城。有日喺公司時﹐收到Home & Garden 致電謂收到我通知要取消所訂購嘅產品﹐但因為該產品已寄出﹐無法收回。佢聲稱我係用我嘅信用卡購買。於是我致電我嘅信用卡公司﹐但係佢哋都查唔到我或任何人用我嘅信用卡喺Home & Garden 購物。該通電話實在令我納悶。因為我申請信用卡時從未填寫公司電話。如果係信用卡被盜用﹐又點會揾上我公司?
第三次係我自己大意, 貪個九折﹐申請左 Gap card 用左一次就無左回事。當月結單夾雜喺一干廣告傳單中送到﹐我將佢放埋一邊就唔記得左。兩個月後收到聲稱係Gap 打黎嘅電話﹐自稱係Gap billing service manager 嘅女士謂可以喺電話付帳可以免罰款。我遲疑﹐表示如果佢俾佢嘅電話我﹐我可以回電。Manager 被我觸怒﹐聲稱佢係manager, 只有佢可以幫我免交罰款。從頭到尾佢拒絕俾佢嘅姓名同電話俾我。我表示如果佢可以再寄月結單俾我(事關以前嘅月結單已不知何去何蹤)﹐我可以收到立刻付帳。佢話月結單再寄出要7-8日先收到。最後我堅持自己網上繳費。後來第二日我收到兩日前已寄出嘅Gap 月結單。亦即係話喺manager稱要7-8日先寄到月結單嘅時候﹐其實月結單早已寄出﹐但係佢毫不知情。不過佢倒係掌握我好多資料﹐佢甚至表示已知道我嘅銀行戶口號碼﹐但係奇在當我申請Gap card 時, 從未填寫銀行戶口號碼。更令我懷疑佢所報稱嘅Gap billing service manager 身份。
各種各樣嘅 scams 到處充斥。各位真要多多小心。