冷清清

父母親返左紐約哪。家父再過十日又返香港。家母則繼續留係紐約照顧小小小人兒。
尋晚﹐如常歸家﹐迎面黎嘅係一陣陣冷清清嘅感覺。離家八千里﹐有時都會茫然咁問自己到底係度做緊嘜。不過問歸問﹐然後都會同樣回復日常運作。
近日﹐姊妹們不約而同喊寂寞。作為怨婦俱樂部嘅中堅份子﹐係安慰勸勉之餘﹐有時都會忍唔住問下自己﹐其實我寂唔寂寞? 。當然唔會嚴重到要同李忠盛齊齊大唱"寂寞難耐"嘅地部啦﹐但係如果我話一丁點都無係假嘅。
一個多月以黎﹐因為趕圖或其他活動充斥﹐無太多時間悲秋。一旦靜落黎﹐再加上點點離愁﹐突然有多少落寞嘅感覺。當然疏於靈修亦係原因之一。
好似積琪蓮所講﹐要每日靠主﹐常常喜樂﹐談何容易? 但神應允雨後陽光。既然我哋嘅神話可以﹐我就願意相信係可以嘅。孤單一人嘅日子﹐有時處係高峰﹐有時身陷低谷﹐多得身邊各路好友嘅支持﹐陪伴同鼓勵。有時我係安慰者﹐轉個圈就可能到我需要別人安慰。感謝神﹐賜予愛我嘅家人﹐朋友同佢自己。
今夜歸巢﹐將依然冷清。但希望我能緊記何處係溫暖嘅源頭。