事奉有感

零晨四點﹐依然係度輾轉反側﹐無法成眠。皆因今個主日係我第一次係崇拜領詩。雖然以前係其他場合領詩無數次﹐但係要係崇拜領詩著實係有非一般嘅緊張。
崇拜開始﹐詩班如常列隊進場﹐我亦如常係隊伍當中。之不過當詩班如常入座﹐我就同主席Peter 繼續前行上臺。當時真係有一種火車脫軌﹐不知所惜嘅感覺。等坐低﹐見Peter 立即禱告﹐我先定落黎。默禱數秒﹐突然放開懷抱。無錯﹐我唔係上臺做一個叫"領詩"嘅人俾會眾睇; 我係黎崇拜﹐只不過我今日企嘅位置同平時唔係好同﹐就係咁簡單。所以當開始唱詩嘅時候﹐我就做返平時係臺下崇拜嘅我。正如Peter 所講﹐我哋嘅VIP觀眾係神自己。
不過到詩班獻詩獨唱嘅時候就真係慘不忍睹。全部高音部份都扇軚扇到過隔離lane. 雖然臨場走音係我嘅強項﹐但係好似今日咁離譜都真係令人汗顏。起初不免都有啲耿耿於懷。但係好多謝各位弟兄姊妹嘅支持同鼓勵。甚至有一位我唔認識嘅伯伯都黎鼓勵我﹐令我真係好感動。好似聖經咁話﹐愛能遮掩一切嘅罪。今次我何罪之有? 就係犯左自以為是嘅罪囉。因為事前覺得首歌好易唱﹐而且唱咁多次都無問題﹐惦啦。就算把聲唔好聽都好﹐就算之前循例緊張一陣都好﹐總之就覺得十拿九穩啦﹐祈禱都慳翻。依家諗翻起﹐慚愧之餘﹐真係有啲甜絲絲嘅感恩之情。因為神再一次提醒我﹐事奉唔係靠經驗就得﹐係要靠神架。諗翻起近期嘅事奉 (除左今日嘅領詩)﹐無論帶查經好﹐團契帶詩好﹐攪活動好﹐好多時我都係憑自己嘅經驗同血氣﹐好少靠神﹐好少認真去祈禱交托。甚至有時自持經驗豐富﹐臨尾先黎交行貨﹐反正人哋睇唔出係行貨就得啦。諗落都要替神傷心﹔唔通神只係值得我以咁嘅行貨態度對待咩?
今天的禱告: 求神讓我係每個事奉當中都能夠真真正正嘅與神同工。唔得過且過﹐要將最好嘅獻俾神。唔靠自己嘅能力﹐乃係靠神嘅能力。唔係去討好人﹐而係將自己獻俾神。