品茗

我對茶藝一竅不通﹐知道肉骨茶係湯唔係茶已算一大成就。
家父係無茶不歡之輩﹐為左父母嘅到臨﹐專程買左一中一日兩種茶包 (買茶包﹐好明顯係唔識買茶葉嘅人嘅殺手柬。而且重係一定唔會出錯嘅普洱同綠茶)。
小時候﹐廣州嘅阿婆(祖父胞弟嘅遺孀)有一套中國版圖形嘅紫砂茶壺。係廣州嘅日子﹐見佢每日總愛泡上幾次鐵觀音。聽聞潮州人都鍾意特濃鐵觀音嘅苦澀。而我淺嚐過後就無意再試。但係當阿婆過世後﹐我忽然愛上壽味茶嘅甘香。壽味嘅甘澀雖比唔上鐵觀音﹐但係總令我想起阿婆同佢嘅紫砂茶壺。
大舅父對茶藝可謂頗有心得。今年感恩節﹐大部份時間都係同家人係佢嘅公寓中度過。因為小說中人卓元宗請過夏銘心品嚐香氣濃郁嘅碧螺春﹐久聞其名。終於係感恩節初嚐呢種由乾隆皇命名嘅名茶。可惜當大家稱讚碧螺春嘅芳香時﹐我遲鈍嘅味蕾始終無法分辨名茶同普洱嘅分別。大舅父嘅另一心愛係黃山一葉黃。一片茶葉就能夠泡一大杯茶。見茶色淡黃﹐險與清水無異﹐但係品嚐過後﹐先知其香濃苦澀之味足以比美鐵觀音。
今夜無事﹐心血來潮﹐為自己泡上一杯太子牌純正原枝花旗蔘菊花茶。父母在此期間﹐每日都為佢哋各泡上一杯。連對花旗蔘茶有一定要求嘅父親都覺茶味不俗。溫暖嘅花旗蔘菊花茶入口一刻﹐總算沖淡點點嘅離愁。