關懷與代禱

尋日聯同翡冷翠去探訪一位多時未見嘅朋友同佢嘅母親。朋友曾一度參加我哋嘅學生團契﹐但係因為種種原因﹐已經好耐無見佢。雖然久未相逢﹐但佢同伯母都係開朗之人﹐所以氣氛甚歡。就算係第一次見面嘅伯母都好多嘢講。喺餐桌上嘅個多小時﹐一晃就過。臨別時伯母重好客氣咁送左香氣撲鼻嘅自製陳皮俾我哋。
係回程途中﹐同翡冷翠談起探訪同關懷。 探訪可能好容易﹐但係真正嘅關懷就需要好多愛心﹐耐心﹐甚至智慧。正好早堂鄭牧師講到代禱。向有需要嘅人講一句為你禱告好容易。假如係向肢體講就更容易。容易到一個地部就如同美國人逢人講 "How are you?" 但係要持久地代禱﹐喺見唔到任何果效之下依然鍥而不捨﹐同樣需要好多愛心﹐耐心﹐再加上信心。
自問喺關懷與代禱方面都無特別恩賜。但當然唔能夠話無恩賜就留俾有恩賜嘅弟兄姊妹做。而近日喺關懷上感到有負擔。同好姊妹分享過我好害怕﹐因為其中一位關懷嘅對象需要好多智慧。曾為佢代禱多時但都無付出太多嘅愛心﹐只因其母請求﹐所以作例行公事辦。一直求神賜下一位使者﹐郤從未想過使者有可能就係我。一直認為無論年齡﹐文化背境﹐言語﹐性格。。。在在都無可能溝通。但喺一次聚餐中發現從來唔講嘢嘅佢﹐竟能對我滔滔不絕。喺驚喜之餘﹐亦害怕無力將反叛青年導回正途。真正需要好多從神而嚟嘅愛心﹐耐心﹐智慧同信心。而我嘅代禱亦需要各位為我代禱作支持﹐我嘅關懷亦需要各位對我關懷作鼓勵。原來關懷與代禱好似一個網絡﹐需要比互聯網更互聯至有大果效。願意我哋一齊嚟做網中人。