聖誕系列之 "Polyanna"

星期四晚係公司嘅聖誕派對﹐將會有交換禮物時間。而今年會以polyanna型式進行。三星期前就已抽好籤。我抽到嘅係接待員小妹。同小妹實在真係唔熟。心諗與其花長時間同佢混熟再探其口風﹐倒不如走折徑問佢嘅老死。 老死話佢剛搬屋﹐只知佢曾動過買有東方色彩小擺設嘅念頭。本以為如此一來非常好辦﹐但細想美國人嘅東方色彩同中國人嘅東方色彩未必相同。而且東方色彩小擺設作禮物﹐對正常人嚟講係唔錯﹐但對我哋公司一眾無聊人士而言﹐老死同我都認為未免有欠新意。正躊躇間﹐突然心血來潮。小妹暗戀 timecycle courier 某員工﹐弄得人盡皆知。每次佢嚟送圖挪圖之後﹐小妹都會伏喺窗邊﹐痴痴張望。大家見狀均啼笑皆非。有見及此﹐我專程遠赴 timecycle 嘅基地, 說服佢哋俾我購買其員工制服一件。等待明晚小妹拆禮物時嘅尖叫聲。