跳車

今早搭巴士返工。喺落車嘅一剎﹐巴士突然失控向前滑行。但因為我前腳已出﹐全身重心向前﹐ 所以只有跳落車。不過因為車速尚緩﹐所以著地後只不過晃一晃就企穩。但因事出突然﹐企定後心臟依然狂跳數下。心諗﹐如此超小規模跳車依然驚動我血脈失調﹐唔知個啲高速跳車﹐著地翻滾嘅人仕﹐心臟如何負荷?
其實唔知係唔係自己動作緩慢﹐如此上落車"意外"都唔只一次。以前試過上車上左一半架車就開﹐害我一隻腳喺出面﹐一隻腳喺裡面。又試過入地鐵入左一半門就關﹐害我左邊身喺出面﹐右邊身喺裡面﹐中間俾門夾住﹐幸而車門無法關上﹐立即彈開。不過咪話﹐著實有啲痛。個次重係岩岩省鄉後歸港﹐左手重緊持行李。實在極盡其瘀皮之能事。發生喺我這般如花似玉嘅天仙身上﹐只能嘆一句"該煨"。