"回家特輯"之偶遇

偶遇1: 因為飛返香港嘅係午機﹐所以襯早上洗一次衫。洗完搭電梯之際﹐與一東方男子同電梯。邸機場check-in, 一東方男子拍拍我問我去邊﹐一望之下﹐原來正係早前喺洗衣房同埋電梯所見之鄰居。後來重發現大家同機。心諗早知一齊去機場﹐慳翻一半的士錢。
偶遇2: check-in時﹐分明係美國人嘅counter職員突然轉用國語問我問題。我重以為自己思鄉病發﹐聽錯﹐一時唔知點對答。見我呆在當場﹐佢重用國語話:"你怎麼攪的﹐中國人不會講中文?"終於知道唔係自己聽到"梵音"﹐於是亦樂於用國語check-in。旁人一頭霧水﹐亦只有笑嘅份。
偶遇3: 喺東京成田機場轉機之際﹐眼角瞄到一熟識身影。就係呢個讓我幻得幻失﹐最後得而復失嘅人。慶幸係喺大家點下頭﹐問候一下之後﹐都重有好多嘢講。奇怪﹐十載聚散﹐每次重逢總係喺國際機場﹔費城國際機場﹐香港國際機場﹐東京國際機場。係唔係意味住就算邸步﹐最終你都係會飛走? 既然係要飛﹐當初又何苦嚟騙我呢一場? 何苦要同我訂婚﹐等我宣佈婚事後﹐再移情別戀?
偶遇4: 喺上海其中一晚﹐氣溫驟降。本來要同陳同學睇黃浦江夜景﹐最終不敵寒意﹐要返酒店挪外套。陳同學同我一樣﹐係俄立崗大學建築系嘅。當搭電梯時﹐有另一老外同電梯。因為我所入住嘅酒店部電梯奇慢﹐而我又剛好住19樓頂樓。於是電梯內嘅三人開始搭訕。唔傾猶自可﹐一傾至發現原來老外係多年多年前嘅俄大師兄。三個俄記校友就係咁﹐喺上海某酒店嘅奇慢電梯中相遇。