多倫多豪華團之一餐未平一餐又起

相信好多從悶城到多倫多嘅朋友都有一個共同嘅心志﹐就係口部移左位嘅團契 -- 專喫。由盧氏夫婦大酒店(現改名為多倫多假日豪庭大酒店)贊助嘅專喫團從星期五晚上出發﹐一直食到星期一零晨一點。由韓國料理到日本放題﹐由積積嘅愛心芒果冰到片皮鴨兩食套餐﹐由大泉港式西餐到CC婚禮嘅高級晚餐﹐最後意油未盡﹐零時再出發去食嘅許留山甜品﹐同埋喺香港唔記得食而最終喺多城食到嘅雞蛋仔。真係滿載而歸。
喺度特別向大家推介新開張無幾耐嘅日本放題餐廳 Wasabi. 午餐都有三文魚刺身供應。以$13加幣一位嘅價錢﹐我哋三個大食盧, 大食積加大食花食左60件三文魚刺身﹐非常鮮美﹐另加各式壽司﹐海帶沙律﹐湯﹐麵食﹐牛肉卷﹐串燒﹐豆腐﹐蒸蛋﹐甜品﹐等等等等﹐食到我差啲見到三文魚就尖叫。而晚餐有更多刺身選擇﹐都好似只係$19加幣。
而另一推介係大泉港式西餐。單睇餐牌就已經頭痛。一列廾尺長嘅餐牌寫到密密麻麻﹐差唔多你諗到嘅佢都有﹐令人心猿意馬。不過刁轉嘅靚女我竟然揾唔到我想食嘅四寶飯。不過當我解釋過嘜嘢係四寶飯後﹐老闆娘特別叫廚房做左一客。真高興。
另外我哋又發現一間食住韓流個勢上位嘅韓國料理﹐叫大長今。雖然我哋無去到﹐但係聽聞都唔差。而且女侍應係著住新潮版宮女制服嘅。都蠻有趣。
喺多城嘅最後節目﹐我又有新發現﹐原來美加嘅許留山係無粒粒芒果蘆薈爽架。唔知係唔係只有上海許留山至有呢?