麥當當之謎

今早好肚餓﹐於是去麥當當買左個豬柳鬆餅同薯餅。當我離去之際﹐有位職員追出嚟話我個豬柳鬆餅有少少硬﹐話佢會換個新鮮啲嘅俾我。我心諗幾時麥當當嘅服務咁好? 但係又奇﹐要係有少少硬﹐佢就應該喺裡面就換啦﹐唔洗咁麻煩。返上公司一打開﹐重奇﹐裡面居然有兩片豬柳﹐ 而且兩片都好新鮮。雖然好多時我去買嘢食﹐可能因為啲人可憐我太瘦﹐俾我個份都會比其他人大份少少。但係我覺得今次唔係咁簡單。唔通係有人要落我降頭? 食完會七孔流油? 面對住個雙層豬柳鬆餅﹐ 我竟然有少少唔敢食。不過亦都可能係 compensation。唔理咁多﹐ 一於食完唔洗食晏。