小手術 vs. 大手術

感謝神﹐感謝大家嘅關心同代禱﹐父母尋晚平安到達長島。星期五晨早就會同主診醫生會面﹐決定手術日期同程序。我將會喺星期四晚到達。
喺家母進行大手術嘅前夕﹐我幫自己做左個小手術 。話說我右腳母趾發炎﹐腫痛難當。一步一痛。頭三日唔敢攪佢﹐亦無心情理佢﹐搽啲藥﹐包起佢﹐眼不見為乾淨。結果越嚟越腫﹐越腫越痛。阿某人嚇我話有人腳趾發炎不理﹐後來細菌侵蝕肌肉﹐到最後去醫院放膿後﹐腳趾只剩一小截。連營養學姊妹都話真有其事。再睇姚明腳趾發炎不顧﹐細菌入侵趾骨。手術後30場賽事都唔可以出場。唔係化?! 於是尋晚買好"駕餐"﹐將我多年嚟嘅擠暗瘡經驗移施喺腳趾上﹐忍痛截穿腫處放膿。經過20分鐘﹐同數聲尖叫後﹐終於將大部份膿液放出。清洗﹐消毒﹐包紮。雖然今日重唔可以著鞋﹐但係已經唔洗一拐一拐哪。心情都好少少。事關呢啲非常時期﹐我一定要健健康康﹐先可以好好照顧母親。
求神讓家母嘅手術同以後嘅療程都能夠成功進行。讓佢能完全康復。