六年

又到年終評估。不知不覺間﹐我喺呢間公司已經工作左六年。其中苦樂參半。評估前夕﹐或者近日剛領會少少全然放手交俾神嘅奧秘﹐我竟然一啲都唔緊張。然而評估單居然出奇之好。同頂頭﹐大老細傾左 45 分鐘。雙方都提出對公司﹐對我本人改進嘅建議。45 分鐘評估﹐笑足 45 分鐘。可能過份輕鬆﹐大家都開始無聊。。。

頂頭 : 咁高分嘅? 我明明填左好多左邊嘅格仔架?
(註: 由左至右為低分至高分)
花 : 頂頭﹐我洗唔洗教多你一次邊隻係左手﹐邊隻係右手呀?

大老細 : 花﹐請講下喺未來嘅半年﹐你有嘜嘢目標想達到呢?
花 : 我想嫁個有錢人。
頂頭 : 我嘅志願都係嫁個有錢人喎。
大老細 (好無奈嘅表情) : 咁。。咁我祝你哋兩個好運啦。

花 : 我會做到下年六月。我正辦緊家屬綠卡﹐預計要等六年之久。
大老細 : 真係要咁耐?
頂頭 : 除非佢嫁個美國人囉。
大老細 : 咁你鐘唔鐘意你頂頭呀?
花 : 唔鐘意。
頂頭 : 你唔希罕。你知唔知有越南女仔俾 $30,000 俾我﹐要我娶佢呀。
大老細 : 大家咁熟﹐俾個折頭阿花呀?

大老細 : 嚟緊半年你喺公司嘅任務相信都講得好清楚哪。而我喺嚟緊半年嘅任務就係向移民局示威請願。

雖然喺呢間公司有時會做得好累﹐好氣屢﹐但回心想﹐實在大家對我都好好﹐而我亦學到唔少知識。應該向好嘅方面諗而去感恩。希望我真係能夠學會凡事多從正面去思想﹐少被負面思想自我困擾。