Work from Home

大概因為 MSN 寫住 "開工"﹐所以無睇我網誌嘅朋友都紛紛問我係唔係揾到工。每次我都要解釋前因後果。每次友人都會話喺屋企返工真好。過左一星期後﹐發現大概當中苦樂參半。
樂嘅係。。。
照樣瞓到黃朝白晏﹐橫豎有時差。
可以日日著睡衣返工。
以前等過份大嘅圖 load 緊時要扮做嘢扮上洗手間。依家可以睇小說。再者鋼琴放書房﹐可以轉身就練琴。甚至可以翻房癱一癱。
苦嘅係。。。
日日喺屋企﹐人影都無個。一兩個月可能可以﹐但長時間一定會悶死。
無時無刻處於返工狀態。無放工嘅意識。變相一日做到黑。
出現問題無法即時求助。
以上多項最難忍嘅係見唔到人嘅寂寞。大概因為之前已經有個多月獨留在家﹐本已開始寂寞。
我相信我都係比較鐘意返公司上班。既然如此﹐唔好再偷懶﹐真要快快做好本 portfolio﹐寫好份 resume, 真正開始揾工。