恩福網上崇拜直播

因為流感之患﹐恩福從上星期起特設網上崇拜直播。好使病臥在家﹐又或怕小朋友人多受感染嘅家長可以喺家中崇拜。當然家中崇拜同大夥一齊崇拜無得比﹐但若然真係唔小心病倒﹐都仍可於家中睇直播﹐實屬美事。 又或美加弟兄姊妹﹐可於周六晚同我一齊崇拜。
上星期團契﹐因為固定組員聽講座﹐只乘新人組查經。新人組四十幾人﹐終於有翻小小團契嘅溫暖感覺。第一次同小組 (新人組再分四個小組)食宵夜。原來直播嘅 set-up 係由我哋組嘅小組組長負責。真犀利。犀利在邊? 在我哋組長係失明人士。其實我哋團契導師亦係失明人士。但佢每次彈結他帶詩﹐帶小組查經﹐根本唔會察覺佢與常人有異。導師會將所有經文﹐經文出處﹐講章背熟﹐以便無需 "睇" 就能帶。每次佢講我哋翻到甚麼甚麼書﹐邊章邊節﹐一齊讀。百發百中﹐然後我哋讀﹐佢背。成章成章咁背。相信每次帶組﹐佢要下常人兩三倍功夫。令我感動。而上星期感動我嘅係食宵夜之時﹐另一小組長表現出嘅細心。佢會將食物切細﹐放喺失明組長面前。突然知道原來佢哋長期一直一直如此服侍兩位失明嘅弟兄﹐好讓佢哋能服侍會眾。