日光之下﹐莫強如吃喝快樂

多謝公司同客戶厚愛﹐一浪接一浪﹐多野做到頂唔順。不過已經排好時間表﹐預算進度正常。於是決定表揚一下自己﹐接二連三去玩。
首先尋晚同灣浸以利亞團去釣墨魚。據聞上年釣到三十多條。可惜昨晚橫風橫雨﹐三兩小時下來﹐全船人居然一條都釣唔到。不過其實我無嘜所謂。一來本人由細到大﹐釣嘜無嘜﹐早喺預料之中。二來就算唔釣墨魚﹐單出海亦係樂事。
聽朝我會同冰友們入赤柱玩獨木舟。自從中學考獲獨木舟三星後﹐都未再有機會玩﹐所以興奮莫名。可惜據冰友講﹐赤柱租出嘅係改良版 user friendly 獨木舟﹐亦即係扮獨木舟嘅長艇。有少許失望﹐但划艇都唔錯。小時候暑假嘅必備節目就係去荔灣湖或烈士陵園划艇。一樂也。
玩完獨木舟後﹐會同恩福新人小組去 soho 區飲下午茶﹐行街街。其實主要任務唔係單單聯宜咁簡單﹐而係陪小組其中一位弟兄嘅母親散散心。事緣弟兄兩年前得絕症﹐醫生謂佢大概唔會活多過十年。近日嘅驗身結果顯現﹐弟兄可能好快要再度入院。伯母當然相當擔憂。所以我哋小組中較熟嘅幾位決定出嚟陪陪伯母﹐亦讓佢可以盡情傾吐。同時亦可把握時間多同弟兄聚聚﹐俾佢支持。
然後到星期六﹐會有嚇死人嘅成人遊戲班。事緣冰友S﹐冰友E同我嘅教練們上堂都係教正經野。但其實我哋三個年齡同心態不符嘅女人非常羨慕啲小朋友可以上遊戲堂﹐於是連同冰友S 嘅朋友 ST﹐四個女人向遊戲班之王教練J 申請加開一班成人遊戲班﹐單係俾我哋四個上。我同教練J 講明﹐唔好玩唔俾錢。唔知到時有嘜野玩呢。上完遊戲堂會約埋教練們去唱K。
暫時玩住咁多。然後再努力工作。