考牌之歌

可能因為近期大老闆不斷鼓吹公司各無牌建築師早日考牌﹐所以今早醒前發左個同考建築師專業試有關嘅夢。夢中見自己買左隻吳浩康新出嘅光碟﹐而第三首歌係佢同肥媽瑪利亞合唱嘅考牌之歌。光碟更附設MV。歌曲前半段以國語演譯﹐而後半則以粵語唱出。因為覺得有趣﹐所以喺夢裡將此曲再翻聽一次。醒後基本上已忘卻所有音調同歌詞﹐而唯一記得嘅一句係"如幻影的牆﹐如肥皂泡頂"(而唱到呢度嘅時候﹐MV中可以見到喺加油站上空有肥皂泡在飄。不過倒係見唔到有奇特嘅建築物)。當然我亦忘記歌詞嘅大意﹐只記得係同考建築師牌有關。如是﹐莫非我所記得嘅唯一歌詞係想表達建築師將希望建築喺虛幻易滅嘅事物之上? 如果夢境真係各人潛意識思想感受嘅表達﹐咁肯定我潛意識中非常抗拒考牌。著實我明意識中都怕得要命。無論如何﹐如此奇怪中尚屬正常嘅夢﹐或者可以為我嘅怪夢集添上一頁。