藍莓知多啲

一直都知道多食藍莓對身體有益。只可惜健康又美味嘅藍莓雖不至於價格不非﹐但亦唔係廉價食品。所以一般都難得大量採購。昨日﹐聽某同事講開﹐原來食用藍莓會刺激腦部活動。對於腦部受損兼成日凝住自己患左早期老人癡呆症嘅我嚟講﹐真係一個好消息。於是今晚趁飯前小休﹐喺網上瀏覽左幾個關於藍莓嘅報告。發現原來藍莓嘅健康價值真係非常高。據美國嘅科學研究報告指出﹐藍莓中含有豐富嘅抗氧化劑。而呢啲抗氧化劑有助抗衡形成細胞老化嘅自由基。因而多食用藍莓可以減慢人體老化速度並減低罹患癌症嘅機會率。日本嘅一項研究證實藍莓可以幫助緩解視力衰退。而USDA人類營養學中心嘅神經科學研究報告更指出﹐食用藍莓有改善短暫記憶衰退嘅功效。既然藍莓如此多分﹐等我搜邏各色各樣嘅藍莓食譜﹐然後等餅娘故國歸來﹐強行要求佢整比我哋食先得。