求醫記

身上紅疹生下多粒﹐生下多粒﹐變成滿身星斗。因為無損我嘅美貌與智慧﹐所以我又其實唔太介意。只係做藥濟師嘅二姐怕我暗生怪病﹐所以力勸我睇多幾個醫生。為左令家人放心﹐至今睇左5個醫生﹐只係無個醫生知道係嘜。連蕭醫生介紹嘅老牌皮膚專科醫生都要睇睇下挪本醫書出嚟查﹐令我一額汗。自小最怕睇醫生﹐一直都係可免則免﹐但係今次求醫都幾富娛樂性。。。

醫生S : 亞護士C﹐護士J﹐你哋兩個入一入嚟。
護士C﹐護士J到。
醫生S : 你哋話哩個病人幾歲?
護士C﹐護士J望下我﹐再你眼望我眼。
醫生S : 你哋挪病人 file 時都要睇清楚下啲資料﹐哩個病人有嘜理由41歲。你哋挪錯左另一個同名同姓病人嘅 file 哪。
護士C﹐護士J出去。隔一陣﹐護士J挪左另一個 file 再入嚟。
護士J (唔肯定嘅語氣) : 揾到哪﹐但係哩個病人都成 X 十X歲喎。
我望望個 file, 尷尷尬尬咁話係我嚟架。

醫生P : 你搽左嘜嘢藥呀?
我 : 無呀。
醫生P : 無? 點解你個身咁黐邋邋嘅?
我 : 唔好意思呀﹐亞醫生﹐哩啲係我啲汗呢架。

醫生Z : 比我睇睇你個額頭個粒。
我 : 唔好意思呀﹐亞醫生﹐個粒係暗瘡嚟架。