"回家特輯"之上海交通

嘩﹐過左咁耐﹐終於有時間寫翻"回家特輯"哪。
承如BL同A子所言﹐喺上海搭的士方便又唔貴﹐所以後期我都經常搭的士。之但係一開始我為左要感受一下上海生活﹐所以都係較多行路同搭地鐵。上海嘅巴士都有領教過。雖然無 Camp 常講嘅亡命飛巴咁恐怖﹐但係都有其恐怖性。猶其對於我哩啲經常性比車門夾親嘅緩慢人士而言。
甫一邸埗﹐根據酒店指示﹐可以坐機場巴士到人民廣場。身為大陸妹﹐當然知道喺大陸搭巴士係嘜嘢一回事。但係當巴士一到﹐見到各人衝峰陷陣之勢﹐我立時唔知點應對。好彩我都係尾二一個上車。當最後一位女士後腿離地一刻﹐車就開動﹐只聽見女人大叫"我件行李重係地上呀"。叫左幾次架巴士先停低。有見及此﹐我落車時用盡運身解數﹐喺9秒9之內﹐由最後座﹐橫越中途所有障礙衝落車。
而地鐵亦有嚇人之處。陳同學第一次喺繁忙時間帶我搭地鐵時﹐我就呆在當場。我相信如果邊間電影製作公司有意拍毛主席二萬五千里長征諸如此類嘅影片﹐只要喺上海地鐵站拍個外景再剪接﹐就有十萬大軍嘅浩瀚場面喇。
相對嚟講﹐行路就寫意得多哪。雖然如我一般無方向感嘅人﹐有地圖在手都成日行錯路﹐但係有時錯有錯著﹐可以睇下上海市內嘅唔同風情﹐實為樂事。但係過馬路又係另一辣手事情。第一日自己去豫園玩﹐就喺其中一條路上企左15分鐘。完全唔識過。最後都係見人過就過﹐驚險非常。
所以最後日半﹐我都係改搭的士為多。但係的士司機都未必個個識路。回程時本想搭的士到人民廣場轉乘巴士﹐但係因為人民廣場範圍太大﹐司機都揾唔到機場巴士站。不過又因錯有錯著﹐佢教我搭地鐵轉磁浮火車。實在係好介紹。只要比巴士多12元人民幣嘅價錢﹐就可以將45分鐘嘅車程縮為7分鐘。而且其舒適更係值回票價。