"回家特輯"之祝君健康

身體檢查本來係喺上海之旅之後﹐但係因無須整理照片﹐所以寫在前頭。
年年驗身﹐本來係為左令家人放心。而家人最唔放心嘅就係我個腦喇。因為唔知從幾時開始就成日無啦啦頭痛。幾年前終於做左次腦部檢查。好彩﹐原來我真係有腦架﹐而且照唔到有任何草本科植物。不過阿醫生就話某某腦神經有痙攣傾向。係唔係即係話佢痙下痙下會同隔離個條黐埋一齊? 開左好多藥比我﹐但係最終都揾唔出頭痛原因。於是今年集中火力﹐做齊腦部同頸椎CT﹐ MRI+MRA。哈﹐終於發現你個罪魁禍首哪。報告結果﹐喺頸椎C5/6椎間照到有一軟組織密度影突入椎管﹐做成神經線受壓現像。係你﹐就係你個嘢害我架喇。曳呀。更加曳嘅係阿醫生﹐即係我表哥﹐第一句話你頸椎有事喎﹐第二句就話不過無得救架哪﹐你小心唔好等佢惡化啦。原來其實有唔少人有相同個案。之但係阿護士嘅評語就係﹐咁細個就咁嗱。真高興﹐又一個被我天真無邪純潔可愛嘅外表蒙騙左真實年齡嘅人。
寫下寫下﹐岩岩收到消息﹐喺俄立崗嘅好姊妹(曾經嚟過費城﹐大家重一齊去過NYC玩嘅姊妹T﹐可能齊齊去NYC嘅弟兄姊妹重有印象)因為頭痛睇醫生﹐發現腦部有兩個腫瘤。請大家為佢擺上禱告。亦請各位年年驗身﹐大家放心。