風雲色變

本來重陽光普照。放工時突然響起幾聲悶雷。見神色不對﹐急急腳走人。果然﹐未到屋企就落起豆大雨點。可幸一陣就雨過。但悶雷持續。至返家先知真係風雲色變。雷聲作響之際﹐一條條電光劃破長空。一條又一條﹐如空中伸下嘅魔爪﹐向人間肆虐。場面十分恐怖。我嘗試將電擊拍下。但係點都唔夠佢快。上圖已經係最接近嘅一張。大雨一下子傾盤而下。能見度接近零。黑暗中閃電雷響一下接一下。整面玻璃牆都跟住震。搬左嚟咁耐﹐第一次遇上咁嘅場面。咪話﹐真係幾驚。直情唔敢行近窗邊。可幸唔係持續太耐。突然間又一切平靜落嚟。本來受影嚮嘅互聯網線路又正常翻。一場風雨﹐就此過去。