心酸的情歌

"心酸的情歌"呢一隻光鍱曾經係我嘅首選之一。被塵封多年﹐最近﹐又再重聽﹐竟同時帶出當年嘅心情。原來每一首歌都刻畫左唔同嘅回憶。 未必同歌詞有關﹐可能只不過如觸景傷情般﹐觸動當時聽覺嘅記憶。
正巧﹐尋日同事R無意中播出同事A嘅"痛歌"。原來該首歌係同事A與前男友嘅最愛。但分手後就成為伊最怕聽嘅歌。事隔多年﹐縱然現今已有要好嘅男友﹐但該歌依然令佢難過。幾個女同事於是紛紛道出各自嘅"痛歌"。而我﹐最怕聽"九月中的陌生人"。。。。
十一年前﹐當我重係U Oregon 嘅新生﹐呢首歌係我嘅最愛之一。猶其當年春天﹐與幾位建築生遊 Oregon coast, 反覆重播此曲。當時如此快樂﹐因為同遊中有我喜歡 嘅人。但數周後﹐知道佢與另一位同遊嘅女生一起。"九月中的陌生人"就一下子變成我最怕聽嘅歌。然而當七年後﹐ 與佢再遇上﹐ 此曲又變得可愛。無奈當佢再度離去﹐我就再無勇氣聽該首歌。奇怪﹐雖然往事如煙﹐心境不再﹐但一首歌竟仍然可以如此牽引我嘅情緒﹐帶我穿越回憶﹐抽動甚或已淡褪嘅傷痕。
承言我係一個善感之人。但唔知各位又有無一首"心酸的情歌"呢?