驕傲與羞恥

因為一件事﹐遂又令我諗起呢個問題。作為基督徒﹐我哋好輕而易舉就會講神愛我哋﹐我哋都愛神。好可惜﹐有好多時候我哋卻係覺得神對我哋嘅愛又或我哋對神之所謂嘅愛係一種羞恥﹐而唔係一種驕傲。何以見得? 當我哋覺得講述福音﹐"講耶穌"係難以啟齒嘅時候。對已信嘅弟兄姊妹﹐可以大談主恩﹐事關大家乃"同道中人"。但係對未信主嘅家人﹐朋友﹐我哋可以講好多我哋覺得光榮嘅事﹐驕傲嘅人﹐但係一講到耶穌﹐就好似突然矮左一截咁。包括自己在內。甚至有聽過有弟兄姊妹講唔敢喺未信嘅朋友面前謝飯﹐怕被笑﹐所以扮跌左嘢﹐扮拾時﹐匆忙祈禱。算係對神付上一分"責任"﹐但係又唔洗比其他人知﹐真係"兩全其美"。從此神就成為左我哋嘅"地下情人"。如此說來﹐呢種重係唔係愛?
因為一件事﹐令我體會原來當我哋咁做嘅時候﹐神會係如此如此如此傷心。求神讓我能夠好似保羅所講嘅不以福音為恥。當我喺教會﹐喺神面前講到天花亂墜嘅時候﹐求神叫我睇清自己嘅心。睇清我對神嘅信心同愛到底有幾多﹐實在唔多嘅話﹐求神加添﹐而至我能夠親身體驗神愛嘅真實﹐令我真真正正以神為驕傲。