禱告

從得知媽媽患左胰臟癌到今日﹐ 岩岩好一個月。 但係我卻係覺得好似已經過左好耐。 中間發生左好多事﹐ 但係又好似無嘜事發生過咁。
尋日同大姐講過兩通電話。第一通﹐佢告知醫療保险嘅批準通知已傳真到醫院。第二通電話﹐佢話醫院唔接受醫療保险。大姐非常咀喪﹐問我點解會咁﹐佢話佢已經盡晒最大努力。其實我知道﹐大姐同二姐都盡左好多努力﹐四出奔波。反而我除左禱告以外﹐就一啲都幫唔上忙。雖然魚生。。。。唔係﹐依家應該叫魚牧師同魚師母。。。佢哋兩個要我相信禱告所幫嘅忙係最大嘅。雖然我心裡明白﹐但卻係信心不足。出奇不意﹐大姐喺第二通電話掛線前﹐著我要落足嘴頭祈禱。
其實呢一個月以嚟﹐起起跌跌多次。。。從表姐言過其實嘅告知媽媽患病﹐令我一下子嚇倒﹔到後來從二姐口中得知真實情形﹐原來重有得醫。接住落嚟二姐通過任職醫院揾到主治醫師﹐後來又因為該醫生因公幹外出﹐只可以進行手術﹐未能事後跟進。於是又決定去加州﹐喺我表哥任職醫院揾醫生。醫生揾到﹐又發現因腫瘤同靜脈相連﹐手術過於危險﹐醫生無信心進行手術。然後通過表哥嘅醫院﹐揾到全美最好嘅癌病醫院手術部主任願意作媽媽嘅主診醫生。決定立即赴紐約﹐又遇正香港打風。終於揾到機票成行。醫生又因發生媽媽肝部出現黑影﹐懷疑癌細胞已擴散﹐未能進行手術。 到證實黑影無礙手術﹐ 又出現醫療保险問題。因媽媽離境過久﹐醫療保险終斷﹐從新生效要一個月時間。大姐四出奔波﹐幸遇著跟進嘅職員同情媽媽﹐努力跟進﹐ 結果由一個月縮至一星期通過﹐醫療保险獲批準。本以為可以做手術﹐ 點知醫院唔接受醫療保险。大姐查明原因﹐原來電腦未 update, 將 Medicare 當作媽媽嘅主要醫療保险﹐但其實媽媽嘅主要醫療保险喺 medicaid。於是大姐又扑去 medicaid, 結果岩岩好星期五三點正關門﹐而跟進媽媽檔案嘅職員下星期放假。其他職員又未必好似佢咁努力跟進。。。。
事情一波多折﹐大家都有少少身心疲累。當大姐叫我要落足嘴頭祈禱時﹐我可以聽出佢都覺得人所能做嘅都做晒﹐依家人已經無能為力﹐只有靠神。其實我心裡好慚愧﹐因為我近日禱告鬆懈。可能見大姐﹐二姐跟進得唔錯﹐心裡已經靠左人﹐無靠神。全家只有我一個基督徒﹐而竟然兩次分別由大姐同二姐﹐兩位非基督徒提醒我要為媽媽落力禱告。
求神寬恕我嘅罪﹐寬恕我無信心﹐無去靠您。求您加添力量俾我哋。求您俾我相信在您無難成嘅事。求您讓醫療保险嘅事情能夠順利通過。求您醫治媽媽嘅病。求您讓我嘅家人都能夠相信接受您。求您嘅大能﹐旨意能夠成就於天﹐成就於地。阿們。