每 早 晨

每日最快樂嘅時間就係晚上臨瞓前嘅一兩小時靈修禱告。靜靜喺神面前傾心吐意。將所有快樂悲哀同神傾訴。將自己嘅所有﹐將身邊各人嘅需要交喺主嘅手中。每次嚟到神面前嘅時候﹐都會覺得平靜安穩。原來已經有好長一段時間﹐靈修禱告只係例行公事。因為生活中有太多令我分心嘅人﹐事﹐物。依家我終於可以嚐到靈修禱告嘅甜蜜。
可惜我卻發現﹐個一兩小時之外嘅時間﹐我有少少唔記得點樣笑。就算面上帶笑﹐但心裡卻無笑嘅泉源。猶其係每日早晨﹐ 我都要用好大嘅勇氣去面對日出。
但係我嘅心話我知唔應該係咁架。如果我唔能夠從神支取平安喜樂嘅力量。每晚禱告嘅平靜安穩﹐可能都只係逃避。神應許靠住佢可以喺患難當中都歡歡喜喜。而且我哋應常常喜樂。因為神就係平安喜樂嘅源頭。而我雖然每次逃到神嘅翅膀下都能得到平靜安穩﹐能夠感恩。但係我卻無法將神賜嘅力量帶入生活嘅每一分秒。
久遠久遠以前﹐有人話我知佢無法笑﹐無法從心中笑。我為佢心痛﹐努力嚐試幫助佢。因為我自己亦嚐過無法笑嘅光境。非常唔好受。猶記得自己當時講既然神係喜樂嘅源頭﹐當我哋嘅生命同神連接嘅時候﹐就會自自然然能夠從心中發出真正嘅喜樂。原來講容易﹐事實卻係難。原來我自己嘅笑﹐都係因一人或一事。當再無笑嘅理由﹐當環境嘅一切只夠令我哭﹐當我無法24小時都同神連接嘅時候﹐我就無法真正去笑。
但願一切唔係只停留喺理論﹐唔係只停留喺每晚嘅短暫 "喜樂時光"﹐唔係只係停留喺有限嘅四面牆﹐亦無須假借人手﹐而能真正活出基督應許嘅喜樂生命。每個日出都充滿盼望。

每早晨﹐這都是新的﹔您的誠實極其廣大。
我心裡說: 耶和華是我的分﹐因此﹐我要仰望祂。
凡等候耶和華﹐心裡尋求祂的﹐耶和華必施恩給他。
耶利米哀歌 3: 23-25