往事如煙

寫完禱告日誌﹐突然心血來潮﹐重讀90至93年間寫嘅日記。發現好多失落左嘅記憶﹔少女時期嘅點滴﹔初戀嘅滋味。。。
原來我曾經苦戀隔離場嘅網球助教。當年苦苦痴迷﹐但竟然頭尾同佢講唔夠三句話﹐對佢一無所知﹐並且承認佢極之平凡。原來戀上嘅只係佢陽光般嘅笑容。
當然中學各好友嘅名字充斥。你哋又記唔記得? 90年5月5日係校慶。我哋一行12人( 包捨積積﹐CC﹐Iris, Jessica, Asher 媽) 未到正午就走人﹐去聚福來 ( 邊度嚟架? ) 飲茶。然後剎上 Asher 媽嘅比華利山豪宅玩。重有睇。。。睇。。。 "喝彩"? 唔係吔﹐重播咋? 定係錄影帶呀? 做 "喝彩" 嘅時候我哋都未出世。
又記唔記得? 90年5月30日﹐我哋 ( 包捨積積﹐CC﹐Iris, Jessica ) 去太古城溜冰。咁岩遇到另一批同班同學又喺度溜冰。熱鬧非常。加埋又係12人。
咦? 寫過啲咁嘅嘢? "如果我不再是我﹐以第二種身份看我時﹐可能亦覺自己麻煩。我不想的﹐我不是故意的。很多時候﹐我回想自己說錯的話﹐都是霧朦朦的。好像今天的我不了解昨天的我﹐埋怨著昨天的我的所作所為﹐但卻不了解為何自己要如此作。" 咦? 到底我講錯嘜嘢呢? 又無前文後理。不過今日嘅我係唔係都會犯同樣嘅錯? 絕對。真要和應保羅一句 "我所願意的，我並不作；我所恨惡的，我倒去作。。。因為立志為善由得我， 只是行出來由不得我。。。我真是苦啊！"