看呀﹐你的王

(中華海外宣道會丁牧師提供)
一日大主教到紐約主持重要嘅宗教會議。不幸飛機因天氣關係﹐無法降落甘乃迪機場﹐要轉飛 Newark 機場。飛機降落後﹐大主教非常緊張﹐因為佢係主持人﹐而會議快要開始。於是佢叫左架 limousine。
主教對司機講 : "我係大主教﹐要主持重要嘅宗教會議﹐我嘅角色非常重要﹐你依家立即飛車去紐約。"
Limo 司機 : "大主教﹐對唔住呀。但係我已經因超速被罰好幾次哪。我再被捉一次就要停牌架哪。我屋企有妻有兒又有老媽等我養﹐我唔可以無工做架。"
主教好唔憤氣﹐於是叫司機落車坐後面﹐然後佢自己開車。然後全速前進。
路上遇上兩個交通警﹐其中一個對同僚講 : "我最唔鐘意啲坐 limo 又超速嘅人﹐以為自己好重要就大晒。睇住嚟﹐我一定要發罰單比呢個人。
於是交通警全速追上大主教開嘅 limo。然後查佢車牌。查完之後無開罰單就放佢走。
佢嘅同僚問佢點解。
交通警答 : "呢個人好大﹐好重要架。我唔敢開罰單比佢呀。"
同僚 : "有幾大呀? 紐約市長呀? "
交通警 : "比紐約市長更大呀。"
同僚 : "唔通係美國總統? 但係點解無保標嘅?"
交通警 : "比美國總統重大呀。話時話﹐其實我都唔知佢重要得幾犀利﹐我連佢係邊個都唔知。但係我知佢一定好大粒﹐因為佢個司機係大主教呀。"

然而我哋嘅神﹐佢雖然係最大嘅君王﹐但係卻最卑微地服侍所有得罪佢嘅人。佢嚟唔係要定我哋罪﹐而係為我哋死。佢了解我哋嘅傷痛﹐因為佢嘗過試探﹐被出賣﹐被遺棄﹐受過最大嘅痛苦。佢唔係企喺遠遠咁指責我哋﹐而係溫柔嘅講 : "我願意幫助你﹐願意陪伴你去渡過。"

神呀﹐求您原諒我。原諒我嘅自我中心﹐原諒我嘅自以為是﹐自以為義﹐自以為重要﹐原諒我嘅驕傲與自私。
我從來需要好多好多嘅愛﹐求您讓我從今願意付出好多好多嘅愛。
我從來需要人哋對我包容體諒﹐求您讓我從今多去包容體諒別人。
我從來需要人哋對我憐憫幫助﹐求您讓我從今多去憐憫幫助別人。
我從來需要人哋對我讚賞鼓勵﹐求您讓我從今多去讚賞鼓勵別人。
我從來要求神您為我做這做那﹐求您讓我從今甘心被您使用。
我從來都想成為焦點﹐求您讓我從今謙卑將一切榮耀歸比您。
阿們。