飛革宅

以下內容可能會引起閣下胃部不安。

唔好意思﹐因為喺南極星揾唔到 gak jak 二字﹐又唔可以叫佢做甲由﹐又唔想文雅地叫蟑螂﹐所以暫稱其革宅。
話說尋晚做做嗄嘢﹐突然有一物體飛過﹐撻左上度門。一睇﹐嘩﹐天﹐係一隻有兩寸長嘅革宅。連埋條鬚足有四寸。正想打時﹐佢就飛走左。走嘅意思係離開我攻擊範圍﹐但仍在書房之內。老實講﹐聽就聽過有飛革宅﹐但見就真係頭一次﹐真係比普通革宅恐怖十倍。到佢再從某處飛出時﹐我只識尖叫。著實我唔係一個隨便尖叫嘅人。當年 S&L 大婚﹐我碌落樓梯聲都唔敢聲﹐事關婚禮進行中。企喺樓梯底嘅 A弟兄重問我頭先有無聽到重物墮地。我話聽到﹐果件重物係我嚟架嘛。A弟兄奇稱我居然可以一聲都無叫。但面對飛革宅﹐我完全不受控地尖叫。家父出差﹐家中只剩我一人。我在明﹐飛革宅在暗。又唔知佢幾時又會再飛出嚟(佢已經突襲左三次﹐我個心臟已經負荷過重)。又翻緊工﹐唔可以關埋書房門走人。於是成晚就處於緊張狀態。我同 manager 講屋企有飛革宅。佢話飛革宅﹐聽都未聽過﹐重幸災樂禍咁話好彩佢唔係住喺香港。最恐怖係佢拍翼飛時係有聲架。所以我成晚聽到少少聲就彈起。
今日哪哪聲去買翻枝雷達﹐第一件事就狂噴書房﹐然後關門焗佢三個鐘﹐然後繼續做嘢。終於俾我見到佢﹐正自喺暗角處垂死掙扎。再噴佢兩下。八隻腳伸直晒(話時話﹐其實我唔係好知革宅有幾多隻腳)。善後過程﹐真係毛管動。
其實我一直最怕蜘蛛﹐唔係太怕革宅。但係今次過後﹐我終於明白某君點解咁怕革宅。久遠前﹐有次我問佢革宅恐怖喺邊。佢繪形繪色咁話革宅勁樣衰﹐著住果件咁嘅乾濕褸﹐又唔剃腳毛。今晚我絕對認同﹐因為第一次咁近距離面對咁大隻革宅。真係勁樣衰。依架諗起佢啲拍翼聲﹐佢啲腳毛都有啲毛管動。好彩佢係中毒身亡﹐如果要我踩死佢﹐聽到果 "革宅" 一聲。。。。咦咦咦咦咦咦。。。大概革宅一名就係咁嚟架哪。