心怯與感恩

美國公司一份又一份咁俾工程我做﹐令我覺得非常有安全感。除左荷包安全外﹐潛意識內同美國保持連系嘅安全感﹐令我有籍口掩飾唔願意真正投入香港生活嘅心態。終於今日上載完最後一份設計﹐寄出 invoice。Manager 話一月先會再有幾個設計。終於有時間揾工。但卻突然非常心怯﹐突然覺得好似失去保護色一樣﹐突然唔能夠再用無時間做 portfolio 嚟做借口﹐突然要真正面對揾工嘅害怕。其實我真係好怕﹐怕面試﹐怕揾唔到工﹐甚至怕揾到工卻唔知喺香港工作如何 (以前喺香港工作兩年都係喺美國駐港分公司)。
終於又再上左香港建築師學會﹐發現聘請欄有四頁之多﹐每日至少有兩到三間建築公司放出新職位聘人。大概睇過﹐不乏適合嘅工作。但卻令我依然心怯。原來我就算成日話在家工作沉悶﹐但其實潛意識裡根本就唔想改變﹐因為怕﹐怕走我唔熟識嘅路。
但回想﹐我實在好感恩﹐神大概知道我嘅心怯﹐為我作出頭幾個月仍能為美國公司工作嘅安排。讓我有緩沖適應嘅時間。另一樣感恩嘅係三個多月以來﹐不乏弟兄姊妹回港。尋日同魚木魚絲分別後﹐大概又因感冒體弱﹐突然覺得極之孤單。不知不覺又行到溜冰場﹐除教會外﹐俾我最大安慰嘅地方。企左一陣﹐實在好唔舒服﹐於是又孤孤單單一人回家 (家人昨午飛紐西蘭﹐因為買機票安排行程時﹐我尚未知前路如何﹐所以當時決定唔同行)。回家打開電郵﹐首先見到魚木魚絲喺地鐵站就寄嚟嘅電郵﹐然後就見到 BBT 回港省親嘅訊息﹐突然又一陣溫暖在心頭。
慚愧﹐自己如此懦弱。但感恩﹐正如念念尋晚同我講﹐既然相信神過往嘅安排﹐我豈唔應該放膽去相信神往後嘅安排?