球類活動

嘩﹐老表一開口就話英格蘭贏波。唔洗聽佢把聲都想像到佢個興奮樣。事關見慣一眾舅父們睇波果個肉緊樣。只可惜我完全感受唔到。因為我唔識睇﹐亦對足球無興趣。話時話﹐我曾經被熱愛籃球嘅前度話我唔識睇波。重叫我睇下某某女友為左某某學睇波云云。話歸話﹐我照樣故我﹐睬佢都傻。
咁岩又見忌廉頭同板娘打羽毛球打得咁開心﹐諗嗄我自己其實對球類活動真係無嘜天份。主要我反應慢同跑得慢 (中學時每年體育都會紀錄每個學生嘅60米短跑速度。討厭嘅體育老師居然叫我同另一位同樣超慢嘅同學一齊跑﹐然後叫其他同學估下邊個慢啲)。遺傳真係一件奧妙嘅事情﹐我一定係得自老爸嘅單傳。貌似媽媽嘅兩個家姐都熱衷球類活動。媽媽中學時係籃球校隊隊員﹐二姐熱愛羽毛球﹐大姐更加唔洗講﹐乒乓球獎杯獎牌無數﹐更曾與香港隊出賽澳門。至於家父。。。嘻嘻嘻﹐同我一樣跑得咁慢。我倆相貌亦相似。
不過話得說回來﹐我都幾鐘意打網球架。至於點解﹐因為張德培囉。就係一場法國網球公開賽﹐令我一夜之間﹐無哪哪鐘意左打網球。不過鐘意歸鐘意﹐唔代表識打喎。然而諗起喺賓大嘅時候﹐差唔多每個禮拜夥同大家打網球打到零晨嘅日子﹐實在非常懷念。點解依家大家都唔再打嘅?