寶貝

終於﹐終於我擁有自己嘅大提琴同溜冰鞋。好似突然擁有兩個寶貝一樣。

多謝恩福堂倫牧師嘅幫助﹐輾轉聯絡﹐尋日同小晶去左羅氏琴行﹐相會我嘅新大提琴老師。同時亦遇見我嘅大提琴。本來打算試晒所有琴﹐如果唔岩﹐重有另一間提琴專門店。但係當我試到第三個琴﹐一種好微妙嘅感覺﹐我知道我唔需要再試﹐就係佢哪。無論係略細嘅外形 (比較難揾)﹐木色與紋路﹐亮中帶柔嘅音色﹐完全就係我心目中嘅樣式。再知道價錢比我預算中嘅最低價重要便宜兩千。老師拉過都話不俗。於是當日就帶佢翻屋企。咁多年之後﹐我終於擁有自己嘅大提琴。只可惜尚未揾到適合嘅弓。羅氏送左一枝略舊但比較輕身嘅比我。等以後遇到好嘅再買。

今日問左教練﹐佢話﹐都差唔多係時候買鞋哪。我諗租嘅溜冰鞋大概就快唔能夠承托我嘅需要 (租嘅溜冰鞋鞋身較硬﹐toe pick 較細﹐冰刀較矮﹐刀鋒太鈍)。於是我又帶另一位寶貝回家。

不過有喜亦有落。落係跌落地嘅落。今日上完堂﹐正自練習時﹐跌左個溜冰以嚟跌得最跌嘅跌。我一直有心理準備我會喺練習跳轉落地時跌傷自己。但我今日居然係喺左 outside 轉右 outside 時俾自己 kick 襯自己。非常無聊。但跌過無數次﹐今次我真正喊痛。到底我跌得有幾樣衰? 場內一般有兩位 skatecop 維持秩序同扶起跌低嘅溜冰人士。但係佢哋通常都唔會點扶跌低嘅溜冰學生﹐睇情況而定。但今日當席嘅 K 都要走過嚟問需唔需要扶我離場。我教練喺較後方見到事發經過﹐問完我有無事後就話 : 嘩﹐睇住你插冰咁插。不過感恩無斷到任何嘢。雖然又流血﹐又瘀又腫﹐喺敷完冰後又一條好漢﹐又一個靚女﹐繼續練習。

我知﹐我知﹐幾十歲﹐骨都脆。真係唔 come 跌。所以我每次溜前都要祈禱﹐求神保守。希望唔好發生以下嘅多種事故。不過我亦有排都未到咁嘅 level。

注意: 以下片段可能會引起閣下不安。