又一年

記得好清楚﹐2007 年 5 月﹐有人感嘆謂今年已經過左五個月﹐快得可怕。言猶在耳﹐時間已經嚟到 2008 年。
同今年聖誕日一樣﹐喺家中渡過。尋晚﹐正翻睇 Pride and Prejudice 睇得入神。中途順應自然嘅呼喚。回應中﹐聽到家父致電家母﹐喺電話度講香港剛剛踏入 2008。所以我嘅新年係喺廁所中順利過渡。
今日午間﹐同 VaVa 喺 MSN 補翻倒數。Webcam 中互相道賀。非常高興﹐真係好耐無同妳傾計哪。不過傾計途中嚇嚫 VaVa。話說我哋講緊唔好喺使用 webcam 時嚇人。例如明明對方 home alone, 你無啦啦問佢企喺佢後面嘅係邊位。我同 VaVa 講﹐雖然我呢邊日光日白﹐但如果佢咁樣嚇我﹐我會當場嚇死俾佢睇﹐因為家父外出﹐我著實係 home alone。當我哋講開其他話題時﹐父親歸家﹐未有機會同 VaVa 講﹐爸爸就喺我後面行過。 VaVa 當場話 " 你後面真係有人呀。" 我立即話係呀。VaVa 話佢真係被嚇倒﹐好彩我立即話係﹐而唔係話 "唔好玩哪。" 唔好意思﹐真係新年溜溜就俾我嚇嚫。呵呵呵。。。
喺呢度祝福大家﹐希望大家新嘅一年﹐唔好被人嚇嚫﹐唔好咁多紛爭﹐但有多啲感恩﹐多啲如意郎君﹐人人快啲結婚﹐家家年年歡欣。