恩福大家庭

不諱言﹐我實在好喜歡恩福嘅崇拜。但係一講到團契﹐我就有所保留。甚至覺得有壓力。不過我會繼續返﹐直至我適應﹐或直至我完全無法適應。
我返星期五嘅職青團。人數 220人。第一次返連我在內就有十幾個新來賓。唱詩後﹐其中一位導師佈告。當中一項佈告係叫團友唔好俾自己嘅電話俾新來賓﹐因為你唔知佢哋係嘜嘢人。事關恩福太大﹐龍蛇混雜。如果你俾電話俾新來賓﹐係自己冒險﹐後果自負。作為新來賓嘅我﹐坐喺位度﹐覺得好唔自在。分組時﹐我當然喺新人組。但新人組太大﹐再分新新人組。第一次返嘅十幾人全部喺新新人組。有幾個 helpers 同另一位導師帶。查完經﹐就各散﹐亦無人會走嚟同你講嘢。
第二次返﹐依然喺新新人組。發現除 helpers 同導師外﹐只有另外三張認得嘅面孔﹐其餘嘅新人﹐又係另一批。再重新介紹一次。其中一位上次有嚟嘅朋友﹐上次話自己未信﹐今次話自己信左。然後話上次係講大話﹐突然又話今次先係講大話﹐因為全組人都信﹐只有佢未信﹐覺得好似落單﹐所以話信左。然後又話要講真話﹐認真講其實佢信左。咁攪嘢﹐都聽得出佢未清楚信仰。未清楚亂講嘢﹐情有可原啦。點知我唔係俾呢位新朋友嚇親﹐而係俾導師嚇親。因為好明顯佢好不滿﹐於是同個位新來賓講﹐"我好想知道你嚟嘅目的係嘜嘢。一時話信左﹐一時話未信﹐我覺得你喺度玩緊我。你係咁嘅話﹐我會請你離開。" 於是新人話咁我走囉。最後一翻調停後﹐由新人向導師道歉﹐終於無事。查完經﹐照樣各散。
地鐵中﹐見到其中一位新朋友﹐主動走過去搭訕。佢話原來佢返星期六﹐返左三個月﹐因為工作關係﹐要轉星期五。所以要由第一堂重新上過。(所有新人﹐唔理你信左十年﹐廾年好﹐一律要上三個月福音班﹐出席率超過七成者可以考試。考試合格者可以升班。再上三個月"價值觀重整之旅" 然後先可以分入正式團契小組。不及格者要由新人組福音班重新嚟過)因為新人組嘅人嚟嚟去去﹐好可能今次見嘅一批﹐下次又係另一批。人太多﹐helpers 亦無遐相顧。加上大家對新人有防犯之心。所以個位新朋友同我講﹐捱過半年就有正式團契生活哪。
捱? 點解要用一個捱字? 但事實上我亦有同感。當返團契變得有壓力﹐我亦只能捱過適應期。
契仔媽嘅好友亦喺恩福。契仔媽話會同我哋 connect。
同姊妹I 講 (姊妹I 係喺灣浸認識嘅姊妹)﹐如果我最終無法適應﹐就會去佢嘅團契。但如今唔想轉嚟轉去。
多謝契仔媽同姊妹I﹐俾我鼓勵﹐皆因佢哋亦經歷同樣嘅適應期﹐完全明白體會我嘅感受。當初覺得自己咁耐仍無法適應好無用。越想快快適應﹐越加添壓力。但知道我原來唔係落單﹐心裡舒坦多哪。感謝你哋﹐亦感謝神嘅安慰。