自作孽

今日心血來潮﹐問阿怡到底有無試過啲教練或 skatecop 被人拉跌。怡話 skatecop 都會有﹐教練就比較少。於是講笑咁講等我下堂故意拉跌我教練。怡笑言會係我跌多啲。
轉個圈頭﹐麥兜時間又到。今日出場嘅係麥嘜。今日係阿信扮 (skatecop 要輪流扮)。佢走去撩我教練﹐於是教練後溜避佢﹐麥嘜前溜追。兩個一前一後溜得極快。我教練突然轉前溜想溜到麥嘜旁邊﹐點知出現方位誤會﹐結果兩人急停下相撞。麥嘜一大份咁 bell 埋去﹐bell 低左我教練。嘩﹐真係話口未完就目擊教練跌低﹐重要係我自己個教練﹐重要係俾隻豬撞跌。於是興奮得制﹐同另外幾個已經笑彎腰嘅教練拍掌歡呼。當麥嘜溜到我身邊時﹐我即刻同佢嚟個 high 5。點知我動作太大﹐high 5 完﹐喺眾目睽睽下自己失平衡叭左喺度。教練笑住走埋嚟話﹐"你唔洗見到我跌興奮成咁呀?" 怡話﹐"呢啲真係叫做自作孽哪。"
好瘀呀。