無良教練

尋晚開夜﹐今朝已經有少少瘟瘟蹬蹬。加上一食完午飯就上溜冰堂﹐重要做一組自轉同時公轉嘅動作。所以當我公轉到第三個圈時﹐已有少許暈眩。停低。教練話 "洗唔洗攞個惠康百佳膠袋俾你? 最緊要有兩邊手挽個種﹐可以勾落你對耳度。"
於是今日成日見到背心膠袋﹐腦裡就出現對耳勾住個百佳膠袋喺度嘔嘅畫像。於是無哪哪就會喺條街度笑。要知道一條街有幾多人攞住背心膠袋。無嚇親人已算萬幸。
同上次一見到牙刷就諗起攀山 grid 對門牙插住條牙刷毛通街走嘅慘劇有得揮。
話時話﹐如果你哋自己一個喺街度忍唔住笑會點做? 除左扮咳同扮講電話﹐重可以點?