四度

尋日下午返工﹐心血來潮想食西餅﹐於是買左一盒帶返公司。然後左手攞住一袋圖﹐右手攞住一盒餅搭扶手電梯(但係無手扶) 落月臺。到底中途出左嘜野錯? 完全無記憶﹐只知突然失平衡。下一秒就往下跌。跌低前瞄到月臺有乘客望住我定左格﹐有人作走過嚟電梯底狀。電光火石間﹐腦裡諗我會碌到底。再下一秒﹐我發現自己踎左喺度。再下一秒﹐我就企翻起身。見到乘客依然望住我﹐見我無事﹐散。當時扶手電梯已經差唔多落到底。我完全唔記得到底成件事點發生。
返到公司﹐先至望下對腳。好彩著住牛仔褲﹐擦傷唔多﹐主要係瘀傷。攪笑嘅係腳上有一條條清淅紅印﹐同扶手電梯級嘅一條條憫合。左腳踝輕度扭傷。最傷嘅係盒西餅。打開一睇﹐十足災區現場。其中一件長形西餅﹐同事話似火車出軌。我食左件面朝下﹐啲 topping 碌到周圍都係嘅蛋糕。心裡實在感恩﹐如果我真係碌到底﹐就會好似件蛋糕咁。
今次係第四度喺梯間跌倒 (前三次喺普通樓梯﹐都記得好清楚過程。奇怪今次真係諗唔起事發經過)。故事教訓﹐落樓梯真係要小心。