我的龍捲風

花式溜冰有三個主要嘅範籌 : jump, spin, footwork。就算國際選手中亦有好嘅 jumper﹐可惜 spins 就平平。或者好嘅 spinner ﹐但 jumps 卻經常失誤。兩方面同時超卓嘅唔算太多。
學左溜冰不覺已一年另四個月﹐當然無法與從小習武嘅同學相比﹐但亦自覺進展尚可以。樂在其中。一開始﹐因為自知跳得唔高﹐想必自己大概應該 spin 得好過 jump。估唔到年多以後﹐發現原來剛相反。jumps 已剛剛完成 freestyle 3 level, 大概下個月可以開始 freestyle 4。但 spin 卻仍停留於 freestyle 2 階段。縱使一路進步中﹐但一個 scratch spin 練左差不多一年﹐重未合格。而冰友間亦幫我嘅 spin 改左唔少名﹐例如 "太極 spin"﹐因為有時轉到一半想跌想跌﹐我會雙手舞動﹐十足耍太極。又例如 "乳鴿 spin"﹐因為我雙手前伸時會過份緊張﹐縮起雙肩﹐手無法完全伸展﹐變成乳鴿狀。又有 "乳豬 spin"﹐當我收回雙手加速時﹐位置不對﹐變乳豬。我同教練講我發明左咁多唔同嘅 spins﹐應該買版權再喺奧運會表演﹐教練話你講緊殘奧呀? 但最嚴重莫過於我無法揾到中心點﹐因此一路轉會得一路走位。時好時壞。話說有一日我練緊 scratch spin﹐一入位就知衰左﹐但都姑且繼續﹐最後因為搖擺得太利害﹐無法唔停底。剛巧冰友 C 溜過。問我攪嘜咁架﹐見我一路轉一路打斜咁走位。我問佢我似唔似一朿龍捲風。結果佢話﹐你簡直就係一個會走嘅比薩斜塔。。。。 -_-" 滴汗