恩典滿載

前兩天﹐回顧以往網誌所載有關前美國公司中發生嘅趣聞趣事。思念已故嘅老闆之餘﹐亦思想過去所有工作嘅日子。原來快樂居多。原來一直被眷顧著。從 HBA﹐ 年幼少不更事﹐居然夠膽同上司玩捉迷藏以避工作。到 PA, 有一班白癡無聊同事頂頭老細。甚或回歸後嘅 DPi, 全公司皆基督徒﹐而且重要係變態嘅基督徒。每每讓我遇上好同事好上司﹐原來唔係理所當然。一切乃恩典。
因金融危機﹐DPi 生意慘淡﹐公司終於落實講左好耐終於實行到嘅每月公司祈禱會。雖然唔係 DPi 正式員工﹐但公司有祈禱會﹐著實好窩心。猶其因為同各同事相熟﹐甚至比起自己團契小組認識更深﹐因此可以有好多分享。但可能明早嘅祈禱會將會係我最後一次嘅參予。因為我已接到受聘通知。但因為唔係我最想入嘅一間﹐所以想等多兩日睇睇我面試過又最想入嘅一間有機會否。不然﹐我將會下星期三開始新工作。雖然唔係理想公司﹐但衰退時期﹐焉能揀擇? 心裡惶恐﹐未知新工能否適應? 同事上司能否和平相處? 但想起明早可以與舊同事一起禱告交托﹐心裡突感平安。