新春慶典

今晚係中華基督教會廣東話堂50年一度嘅聯合團契聚會﹐慶祝農曆新年。而各個團契均分工合作﹔以琳﹐伊甸煮飯﹔佳方寫揮春﹔以諾帶遊戲﹐整甜點﹔至於我哋揚恩就負責佈置同領詩。號稱唔怕醜或唔知醜嘅我連同詼諧樂隊嘅成員今日提早返教會練習﹐但係都鼎乘一慣嘅傳統: 各自各精彩﹐臨場執生﹐攪錯拍子得啖笑﹐呢個就係詼諧一名嘅由來。我哋絕對唔會浪得虛名。
晚會由龍虎武獅帶頭開始。接住落嚟有佳餚美點﹐實在非常豐富。晚膳後有詼諧樂隊充滿活力嘅領詩﹔魚生帶領嘅福音粵曲﹐然後就係佢風趣幽默嘅訊息。魚生用一個雞字將教會一家﹐彼此和睦相處嘅秘訣生動咁帶出。接住有考你腦筋嘅燈謎。各網友可能都記得我係燈謎愛好者﹐所以非常投入。而我哋組更以榜首勝出比賽。從而發現我哋教會真係好多才子才女。燈謎後就係大家玩到尖叫狂笑嘅遊戲。盡興嘅一晚喺笑聲掌聲中結朿。
願意我哋教會能夠有更多如此聚會﹐好讓肢體間有更多更深嘅認識﹐更感到教會一家嘅溫暖同快樂。願意我哋再唔係好似以前常講嘅教會人數加增﹐地方見少﹐人與人中間嘅空間減少﹐但心靈與心靈中嘅矩離卻拉長。願意我哋成為一個彼此相愛嘅教會﹐能成為神大愛喺地上嘅見證。