地盤怪遇

注意! 以下內容可能會引起閣下不安。
有名你叫地盤蝶﹐顧名思意就係成日落地盤嘅花蝴蝶。雖然有時都要日晒雨淋﹐冒寒風大雪度尺睇工程﹐不過基本上落地盤都唔係太辛苦。猶其當喺公司坐得悶悶地﹐出去落下地盤﹐舒展下筋骨﹐都唔錯。而且我最鍾意睇人施工﹐睇足成日都唔悶。不過有啲工地都相當嚇人。如果係度尺﹐最怕就係果種棄置已久嘅商業廚房。一桶桶唔知嘜年代嘅唔知嘜嘢水﹐一地唔知係半液態定半固態嘅唔知嘜嘢泥﹐牆面又軟又貼又濕﹐但因工作關係﹐都要行近伸把尺埋去。又或者睇住有廾幾隻蟑螂都逼住要踩入去嘅地方。又或係陳年樓嘅地牢﹐ 得一個15火燈炮嘅照明度﹐千瘡百孔嘅牆唔知隨時有嘜走出嚟﹐ 長長嘅狹道又唔知通去邊 。。。不過可幸一般度尺都會兩個人去﹐只有少數情況會單人匹馬。落地盤試過踩釘﹐仆嚫﹐撞瘀﹐割傷。有次去清拆中嘅工地﹐同事A企喺一面GWB牆前﹐牆嘅另一邊﹐因為太嘈而唔知我哋喺度嘅工人﹐開電鋸拆牆﹐電鋸穿牆而過﹐見狀﹐佢唔鋸死我都嚇死。不過真正驚嚇嘅一次係喺三年前。。。。
果間係棄置左嘅診所﹐若一萬尺左右。因為樓底高﹐所以有一作為儲物室嘅閣樓﹐由鐵梯通往。因為所有窗已經封起﹐而偌大嘅室內只有幾盞 emergency light 重生效﹐所以雖不至伸手不見五指﹐但都非常非常黑。靠住自己帶去嘅照明工具上閣樓開工。黑暗中聽到鐵梯有腳步聲。一來因為靜﹐二來因為鐵梯可以發出聾重聲響﹐三來我哋就喺鐵梯無幾遠﹐所以同事Q同我都聽得一清二楚腳步聲係向上行。同事Q立即走過去問 "Hello, who is this?" 腳步聲停止﹐同時同事Q亦已到梯邊﹐但係見唔到有人。亦無聽到有腳步聲向下走。於是我哋快快手度埋幾個尺寸走人。幾日後﹐同事Q同我講大廈管理員同佢講 : "You don't know that? We all know that, that space is haunted."
係魔鬼嘅技倆﹐定係可以用理性去解釋嘅情況﹐如樓上鐵通排水管有水通過嘅聲音? 不得而知。