唔怕生壞命﹐最怕改壞名

有見及西門子嘅花草樹木一家親﹐咁欣欣向榮﹐又忍唔住要講下改名嘅問題。GF嘅眾位可能都聽我講過﹐事關我對改名 ( 同改人哋花名) 特別有興趣。 事緣家母想我哋剛柔並重﹐所以三姊妹名字裡都有光有花 ( 部首)。 而且一字排開﹐大姐名字意指收集﹐二姐係茂盛生長﹐我就係收藏。係一個過程。小時候不明所以﹐經常為自己陽剛氣盛嘅名而感尷尬﹐所以成日幻想自己改過另一個名。咁就造就左我對改名嘅興趣。後來大個女﹐知道父母嘅心思﹐先開始鐘意自己個名。不過依然對 名字甚有興趣。
話說喺俄記時﹐某同學個同學叫欣欣﹐佢細佬就順理成章叫向榮。朋友話佢個中學女同學姓黃﹐迷上黎明﹐於是話"如果佢叫黎明﹐我願意叫黃昏"。但係未必每個父母都咁有詩意﹐咁考慮周到。例如堂兄小學同學姓卓 (我覺得呢個字好有氣質﹐作為姓氏就更有氣質)﹐個名都好有氣質﹐叫子恆。只可惜放埋一齊就慘被叫足咁耐"腳趾痕"。又例如二姐小學男同學﹐一出世時一定令全家高興﹐亞媽最高興。於是改名為媽興。不過佢姓吳﹐變左做吳媽興。又係俄記同學﹐佢中學有位金姓同學﹐ 佢話佢亞媽一定好想發達﹐所以大女兒叫金鑽石﹐小女兒叫金寶珠。溫碧霞個亞爸一定好鐘意飲啤酒﹐所以溫碧霞原名溫啤霞。
中國文字真神奇﹐三兩個字放埋一齊﹐就可以或有氣質﹐或令人咋舌。實在有趣。